直播靈接觸丨「凶宅清潔師」出動三法寶送冤魂 羅泳嫻爆地產經紀凶宅蛇王出事

由梁思浩、黃紫恩（Jojo）同黃耀英主持嘅《直播靈接觸》，13 日晚播出嘅ㄧ集討論話題為「凶宅」，嘉賓請到風水師周漢明以及曾從事地產經紀嘅塔羅占卜師羅泳嫻（裸泳）。

黃耀英、周漢明師傅、梁思浩、占卜師裸泳及 Jojo。

節目中講到凶宅都有程度上嘅唔同，裸泳話業界會將之分為三類，分別係自然死亡、自殺事故以及謀殺，樓價折讓由一成至三成以上不等，佢話︰「除咗凶宅有啲屋都會有靈體喺裏面，你會 feel 到、有跡象，入到去會唔舒服。試過有同事上凶宅偷懶，入到屋啲門自己閂，就知出事即刻走。」裸泳透露凶宅嘅不安指數，會連帶令同層甚至樓上樓下，銀行都估唔到價，裸泳補充︰「不安指數係視乎凶宅所發生案件嘅轟動性，越兇殘、血腥、每一年（傳媒）都會提嘅，就會非常高。」

昨晚話題為「凶宅」。

周師傅話想知道樓盤是否「宜居」，不妨睇樓時帶備兩大「法寶」︰一缸黑摩利魚或者7歲以下小朋友同行。周師傅係真實版「凶宅清潔師」，處理過唔少凶宅，多年前轟動一時嘅「公仔頭兇殺案」以及「烹夫案」都到過現場視察。周師傅形容「公仔頭兇殺案」現場情況令人震驚猶如亂葬崗︰「嗰時應記者要求同徒弟一齊去睇，入去無耐徒弟話見到有『人』行過好恐怖，跟住感覺好頭痛、毛管戙好想走。」

周漢明師傅示範密宗淨屋儀式。

周師傅直言去完該兇案現場，自己運氣亦有一段時間變差。周師傅透露一般會為凶宅進行密宗淨屋儀式，步驟係先喺家居正中位置以及亡位誦經唸大悲咒，令冤魂放下自在解脫，之後焚香清屋同拜五角，隨身仲有一件法寶降魔杵超渡亡靈 。

「凶宅清潔師」周漢明師傅 三法寶「降魔杵」「拜五角」「大悲咒」送冤魂。

思浩就分享曬天針嘅方法，找一支自己用過嘅縫紉針，於每日上午11點至1點時段曝曬足 7 日，然後用紅紙包住保存。思浩表示天針有鎮宅辟邪作用，睇樓時可以將天針放入一碗清水中，假如有靈體存在，天針會浮面，相反則會沉到碗底。

思浩表示以前人買樓會同時買一張「陰契」，求心安理得。 紅衣女鬼及黑白無常小編，已成為《直播靈接觸》icon。

《直播靈接觸》逢周一晚 9 點半及周二晚 9 點 35 分 TVB Plus（82 台）直播