冼靖峰感激細佬主持生日會 預告新歌班底令粉絲感驚喜

「妙音龍子」冼靖峰（Archie）過去一年音樂事業更上一層樓，喺《亞洲超星團》以第三名出道，成為男團LOONG 9成員。Archie喺26歲生日就同粉絲一齊開生日會度過，佢嘅父母、細佬都到場。不過Archie喺開香檳環節時，竟然嚇到走埋一邊，仲畀細佬笑佢細膽。
 
Archie細佬呢日上有另一個身分，就係生日會主持喇！Archie好滿意細佬表現，大讚佢轉數快又稱職。Archie大爆細佬原定同女朋友去旅行，不過為咗呢個生日會而改期遲幾日出發，所以Archie好感謝細佬支持。
 
雖然Archie喺工作中度過生日，不過佢覺得非常充實，亦一啲都唔覺得攰，喺生日會上一展歌喉大騷「妙音龍子」歌唱實力，聽到一眾粉絲如痴如醉。而Archie向大家透露喺生日會完結嘅第二日就會入錄音室錄新作品，新歌班底更係佢首次合作，絕對令大家感到驚喜。