直播靈接觸丨關寶慧爆亡友張學潤探望 思浩獲黎明詩臨終前報夢

《直播靈接觸》21號晚搵嚟「鬼后」關寶慧現身，同場火拼「鬼王」梁思浩，天生有陰陽眼嘅寶慧分享拍戲時遇到靈異事件，佢話幾年前拍戲時準備穿上一對連戲拖鞋，點知其中一隻無論點都穿唔上︰「對拖鞋係私伙，後來睇返其中一隻明顯細咗一個碼。」請教張芯熏師傅後發現，原來有一隻女鬼寄存喺鞋內，最後由師傅請走。
「鬼后」關寶慧火拼「鬼王」梁思浩。寶慧分享拍戲時遇到「私伙鞋」靈異事件。

寶慧自爆唔少過世好友都會「返嚟」探自己或者報夢，當中已故形象指導Nel Nel 張學潤亦係其中一位︰「Nel Nel有搵過，但係get唔到佢嘅暗示係乜嘢，問極都唔知。」她感嘆會繼續努力修行，希望有朝一日可以知道故友們嘅要求。
關寶慧作客《直播靈接觸》。
思浩亦有類似經歷，早前歌手黎明詩因病於3月28號離世，原來Stephanie臨終前曾報夢與思浩訣別︰「佢28號走，26號佢嚟搵我，夢中同我講拜拜話『我走喇』，醒咗之後打畀佢屋企人講返，佢哋都唔信，跟住隔咗兩日真係走咗。」此外，思浩早前為一家低收入人仕嘅12歲小朋友舉行法事，儀式期間思浩默唸「小朋友有咩想交代」，忽然有把小朋友聲回應話「佢哋好衰爭我筒炸雞」。思浩即刻詢問身旁父母，母親聽後淚流滿面，因為答應小朋友生日會買炸雞最後冇買，小朋友因此跳樓自殺。

《直播靈接觸》逢星期一 21:30 及 星期二 21:35 TVB Plus（82台）直播

梁思浩同關寶慧各自分享故友「返嚟」探自己嘅經歷。