詹天文考完DSE出關見粉絲 預告七月聲夢三小花合體開騷

啱啱考完DSE嘅 詹天文 ，呢日久違現身活動同粉絲見面，Windy話等呢日等咗好耐，所以心情好興奮，不過可能太耐冇出席公開活動，所以面對鏡頭笑容有小小僵硬，不過只要一揸住咪唱歌，Windy即刻好有大將之風，仲又唱又跳活力十足，令現場fans大飽耳福。

本身係學霸嘅Windy話，考完DSE之後一身鬆晒，雖然仲未放榜，但自己就唔會諗太多成績方面嘅嘢。考完DSE之後，Windy已經同屋企人去過惠州旅行，佢話依家仲plan緊，希望可以同同學去一個畢業旅行，而自己最想去嘅地方就係日本。

除咗plan緊去旅行，Windy仲預告嚟緊嘅工作安排已經密密麻麻，當中嘅重頭戲一定係聲夢三小花演唱會，Windy話唔止fans期待，佢地三小花都一樣好興奮，所以一定會全力以赴做好個騷。