鍾嘉欣澄清未懷第四胎 戥舊愛伍允龍努力冇白費

定居喺加拿大嘅 鍾嘉欣 神采飛揚現身香港嘅活動，早前佢就同老公去咗馬爾代夫度假，就惹嚟Linda有第四胎嘅傳聞，身型弗爆嘅佢話呢件事好好笑，大家想像力太豐富，連啲人去老公診所都會恭喜佢，搞到老公一頭霧水。Linda解釋早前消失咗喺社交平台係忙於湊小朋友，仲話有三個小朋友已經滿足，冇計劃再生。

嚟緊8月Linda就會喺廣州舉行演唱會，而老公同小朋友都好雀躍，囡囡仲幫佢諗宣傳海報。佢又自爆平日喺屋企一有靈感作歌，就即刻捉住老公唱畀佢聽。

舊愛 伍允龍 有份演出新戲票房大賣，兼且人氣急升，Linda今次返港都有專登買飛入場支持，佢話好耐冇入戲院睇戲，亦好耐都冇睇過一套咁有香港特色情懷嘅電影，加上對打場面精彩，令佢都話想成為當中一份子。

佢亦大方講到好戥Philip高興，證明努力冇白費，期望佢未來十年發揮才能。問到有冇叮囑Philip再面對觀眾切磋功夫時小心？Linda就話對方好叻仔識保護自己。