林德信自封為湊囡囡能手 蔡思韵支持劉俊謙希望劉太們勿「改嫁」

舊年11月公布婚訊嘅林德信（Alex），話咁快升呢做爸爸，仲專登揀咗喺母親節宣布喜訊。新手爸爸Alex難掩喜悅呢日出席活動，有女萬事足嘅Alex，講起兩個月大嘅囡囡就停唔到口，指囡囡鍾意笑，每次出街都唔怕醜見人就笑。

Alex分享喺太太懷孕九個月，就喺屋企做新歌後期，到囡囡出世後，每次聽到新歌好有反應；佢又話自己係沖奶換片能手，Alex指囡囡中文名叫林明係嚟自爺爺林子祥靈感，阿Lam有日瞓晏覺，喺夢中見到日同月，跟住就提議用「明」字。Alex話當時未知BB性別，但係「明」字可男女共用，Alex又話好體會到BB係家族中快樂來源。

同場出席嘅藝人仲有蔡思韵、隋棠同泰國男星Tor，蔡思韵同男友劉俊謙參演電影票房口碑雙豐收，令男友人氣急升，蔡思韵話恭喜劉生，因為而家好多劉太，希望大家唔好咁快「改嫁」。好耐冇喺香港活動現身嘅隋棠，近排忙於拍攝新戲，當中有唔少動作場口搞到成身血，所以每次返屋企前要將假血清洗乾淨，以免嚇怕家中三位小朋友，因為試過有次嚇到囡囡跑回房喊。