黃曉明認愛後現身「戴假髮」成熱話 新任女友認靚樣40%「加工」

內地男星 黃曉明 早前高調認愛比自己細15歲嘅網紅 葉珂 ，噚日佢現身山東青島參加喜劇節，曉明大哥感覺如沐春風，為粉絲簽名時仲被捕捉到佢右手中指嘅巨型鑽戒，似係公開放閃已經名草有主，「#黃曉明中指戴鑽戒」一度衝上熱搜。

不過相關話題嘅熾熱，轉頭又被另一話題冚過，是關網民影到黃曉明嘅後尾枕出現疑似係戴假髮嘅痕跡，亦令「#黃曉明假髮」瞬間成為另一熱話。其實早喺去年嘅開設餐廳綜藝節目中，有網民經已認為曉明嘅髮際線唔自然，有戴假髮嘅痕跡，之後佢又多次戴帽出鏡，令網民懷疑46歲嘅曉明係咪受脫髮困擾。

曉明大哥疑似「裝假狗」嘅打扮，不禁令網民聯想到新任女友葉珂，日前喺直播時大方向網民承認有「後天加工」:「臉上有Do了嘛，有微Do，但Do的不多，不是從頭到腳都科技人，一點點科技，40%科技吧。」更有網民挖出疑似係葉珂嘅舊照，令人驚訝前後蛻變極大。