胡楓羅蘭分享老友記飲食需要 「緋聞」老友為長者試軟餐

活潑精靈嘅 胡楓 同 羅蘭 呢Pair緋聞老友記，獲邀為快餐集團推出嘅輕嚥料理同推廣大家開飯食物援助計劃，分享長者對食物嘅要求，以及老友記對飲食嘅需要。

5月喺澳門完成演唱會，已屆92歲嘅修哥依然活力十足，呢日佢再分享自己嘅保健心得：「除咗成日運動，飲食都好緊要，食得均衡先可以吸收到足夠營養。有啲老友記其實好為食，不過人大咗，始終喺咀嚼同吞嚥都會有啲問題，搞到食唔到嘢，就愈來愈瘦。今次就啱哂一班咀嚼同吞嚥有困難嘅朋友。我同羅蘭都試過佢哋嘅豉油雞脾同京都骨，味道同埋外形都同原本差唔多，同我一樣又有形又有味道。」

另一位活力老友記，90歲嘅羅蘭亦指除味道之外，非常欣賞呢個計畫照顧到老友記嘅社交需求。羅蘭姐話：「我一直有返工就知道，見吓人、同人交流對我哋老友記保持心境開朗同埋頭腦清晰係好緊要。我做義工時曾經有老友記同我講，因為要食軟餐，少咗好多同朋友家人一齊出街食飯嘅機會。而家老友記就可以同朋友屋企人坐埋一齊食飯，傾吓偈，諗得非常周全。」