鄭丹瑞謝票遇母校老師變「喊包旦」 網上節目一人分飾兩角道出廢老心聲

鄭丹瑞(旦哥)同 盧慧敏（Amy)最近馬不停蹄為主演嘅電影《得寵先生》謝票，日前旦哥現身母校「聖保羅書院」嘅校友場次，因為會見到當年教過佢嘅老師，所以令身經百戰嘅旦哥喺戲院外面經已好緊張，入場時佢雖然故作淡定，向老師鞠躬講「早晨」，老師亦回應佢「乖啦」，令全場爆笑。

旦哥同Amy近日不時為主演嘅《得寵先生》謝票
然後旦哥開始口震震話：「我見到我中學嘅老師，我頭先，依家已經想喊。」話口未完旦哥就爆喊，仲不停捽額頭控制情緒，繼而激動對老師講：「你點會嚟睇我做戲㗎，老師？你要我讀書乖，我都唔乖！」觀眾席上嘅老師話有追睇旦哥網上頻道嘅節目令佢更加感動。
呢日旦哥母校特別場，見到老師嘅佢感觸落淚

旦哥續說：「當年老師對我嘅關顧、對我嘅教育，今日希望老師睇到你嘅學生，做一齣好戲俾你睇！多謝！」旦哥再向老師鞠躬致謝。 旦哥喺自己網上嘅節目度亦一人分飾兩角宣傳新片，健康旦訪問戲中嘅廢老「佳叔」，火藥味濃「佳叔」更掟咪拂袖而去！ 戲中旦哥演超臭脾氣嘅孤獨廢老「任春佳」(佳叔)，「佳叔」喺節目表達心聲，透露「被退休」後變孤獨老人、被女兒誤會、與狗舍和浪浪「燒腩」嘅恩怨等。

旦哥又喺自己頻道一人分飾兩角宣傳