獨家丨潘靜文粉絲聚會熱褲上陣騷長腿 拍劇挑戰喊戲坦言心理壓力大

潘靜文平時多以斯文文靜造型示人，呢日同粉絲聚會，就著住條格紋小熱褲大騷長腿，Sherman除咗同粉絲玩遊戲，當然都有獻唱自己首《傷魚座》贈粉絲。Sherman話好耐冇同粉絲見面，所以特登搞咗個粉絲聚會同大家近距離互動，當中亦有粉絲好有心，送咗一個積木砌成嘅Sherman比偶像，氹得Sherman非常開心。

潘靜文呢日同fans聚會。

除咗唱歌，Sherman喺主持同拍劇方面亦有好多機會，日前佢就啱啱拍咗一部新劇，劇中仲要挑戰喊戲，不過就唔係喪喊，而係要委屈落淚，難度都幾高，Sherman自爆初時被導演話佢唔夠投入，拍出嚟嘅效果唔收貨，搞到Sherman好驚，好彩經過一輪揣摩，都終於拍出令人滿意嘅效果。

Fans用積木砌成Sherman公仔送畀佢。