為紀念羅文八十歲冥壽 官網播放舞台劇白蛇傳

羅文 經已離開咗大家22年，而今年係羅記嘅80歲冥壽，為咗紀念佢全程投入演藝事業，喺舞台上發光發熱嘅一生。 羅文官方網站 將播放佢喺1982年同汪明荃、米雪同盧海鵬喺利舞臺公演嘅粵語舞台劇《白蛇傳》。

羅文早喺80年代身為歌手時，就有一個舞台劇夢，佢為咗實現夢想，不惜傾盡全力投入所有資源，花足一年時間去籌備排練，期間推咗19部戲，全心打造香港第一齣粵語音樂舞台劇《白蛇傳》。

作品於1982年3月4號公演，21場演出全部爆滿，為咗滿足觀眾要求，羅文決定加場演出，並於當年4月8號再度公演。

為咗紀念羅文對夢想嘅熱誠，官網決定於加場演出嘅43年後，8號起喺官網播放全劇嘅影片。早年羅家已將演出母帶捐贈予 香港文化博物館 ，今次就由羅文胞姊向館方申請向公眾播映作紀念，並獲授權於羅文官網獨家播放，日後亦有計劃製作紀念DVD。