蔡瀾傳身體欠佳入深切治療部 社交平台親報平安平息傳聞

與金庸、倪匡及黃霑被封為「香港四大才子」嘅 蔡瀾 ，近年主要經營網上直播頻道及不定時舉行揮春展。不過今個月3號，蔡瀾就喺社交平台表示最近有事忙，逢周五嘅直播將暫停直至另行通知。事隔三個多禮拜，蔡瀾就被指身體欠佳，需要入住深切治療部觀察，一度令外界擔心蔡瀾嘅情況。

當蔡瀾入住ICU消息傳出後，蔡瀾為免大家過份擔憂，佢就以一貫輕鬆淡然嘅作風留言，喺社交平台報平安「謝謝大家關心，未至於病危，請不必擔心。一笑」而蔡瀾嘅秘書都回覆蔡瀾近況「老毛病休息一下就好，沒大礙的不用擔心。」

蔡瀾近年最廣為人關心事件，就係兩年前佢太太喺家中跌倒，當時因為心急去救太太而跌倒，最後導致股頸骨摔碎，醫生為佢換上一塊金屬。其後遇上太太離世，蔡瀾決定搬離舊居到酒店海景套房長住，仲透露每月花50萬聘請8人團隊，包括秘書、管家及工人照顧佢日常生活。