​​林峯Chok爆紅館為七場個唱揭序幕 陳慧琳周秀娜任嘉賓掀全場高潮

林峯一連七場紅館演唱會正式開鑼，草蜢、吳君如、馬德鐘夫婦、古巨基、吳卓羲、何超蓮、謝霆鋒、容祖兒、成龍、楊千嬅夫婦、郭富城、張振朗、梁競徽等一眾圈中人都為佢送上花籃道賀。作為「城寨四子」成員嘅胡子彤，亦化身小粉絲為阿峯捧場。
 
阿峯相隔9年再開紅館騷，事必然做到最好！無論係舞台抑或身材、髮型都令人耳目一新。以一頭金髮霸氣現身嘅阿峯，一連唱出多首快歌，以勁歌熱舞為演唱會拉開序幕，當中亦唔少得唱經典情歌，一首《愛在記憶中找你》令大家嘅回憶返曬嚟啊！阿峯另一套歌衫亦非常搶眼，黑閃背心造型突顯出佢一對麒麟臂之外，佢背部鏤空嘅設計，亦將佢背肌強勁嘅線條展露無遺，令佢Chok爆全場。
 
首場嘉賓就有潮媽陳慧琳，二人合唱卡通片主題曲《馴獸師之王》，阿峯仲表示要做Kelly七月紅館騷嘅嘉賓。而另一個驚喜嘉賓周秀娜就喺《Let’s Get Wet》時性感登場，同阿峯大跳火辣熱舞，認真吸睛。