林峯開騷「城寨四少」舞台合體 劉俊謙被笑似鯉魚變怕醜仔

相隔九年再踏紅館舞台嘅 林峯  一連7晚個唱星期五舉行第二場演出，除 周秀娜 吳林峰 每晚都固定登場任嘉賓外，呢晚「城寨四少」三位好兄弟──「十二少」 胡子彤 「四仔」 張文傑 同「信一」 劉俊謙 亦齊齊現身踏上舞台，時隔多時後「四少」再度同框。 

林峯呢晚以全新粉紅髮色繼續載歌載舞，又獻唱連串首本名曲，嘉賓環節胡子彤、張文傑、劉俊謙上台合唱《風的形狀》，令全場歡呼不斷，三子加上「陳洛軍」再次合體，今次仲係「城寨四少」首度同台演出。

阿峯安排工作人員出動「表演凳」，又即場教上次缺席澳門騷嘅劉俊謙大跳椅子舞，兩人一組，一個坐低，另一人則撐著凳扭腰擺動下半身，當輪到阿謙上陣時，阿峯就不禁爆笑：「呢個角度睇到你好好笑，好似鯉魚。」因為阿謙扭到就嚟反眼，佢就尷尬話：「唔好玩我啦！」

之後子彤接力唱出個人單曲《兄弟打》，呢晚佢嘅家人亦有到場支持。呢晚唔止《九龍城寨之圍城》導演鄭保瑞到場欣賞，連一眾藝訓班同班同學都好似楊茜堯、楊明、徐榮 更係舉晒牌支持，而廖碧兒、樂易玲、吳若希、麥美恩、孔德賢、盧慧敏亦有撐場。