有「香港搖滾教父」之稱嘅 夏韶聲 ，呢日帶埋結他現身音樂節目《J Music》，亦係佢首次作客呢個節目，成個過程玩得好開心。
相隔多年再次踏足電視城，Danny Summer見返一眾幕後同事好開心，甚至門口嘅保安同事都好有親切感，笑言唔想離開TVB。回顧昔日早於1975年就加入呢個大家庭拍劇，直至2000年先離開，但之後Danny Summer都有斷續回巢，包括上節目講UFO，但近幾年真係較少入電視城。
Danny Summer多年嚟演活唔少經典角色，佢坦言現時仍然有戲癮，之前都有接拍電影，如果遇到好角色佢都會回巢拍劇，更笑指唔好做阿爸同阿叔，做阿哥都仲可以。
Danny Summer稍後第4次踏足紅館，亦係佢最後一次嘅紅館個唱，做足準備功夫，仲同大家分享自己開騷前最重要靠游水練氣同記歌詞。
