陳美齡Agnes、姚焯菲Chantel、譚輝智、布志倫Alan、黃博、劉洋、周吉佩、古淖文German、黃洛妍Janees、林智樂Felix、謝淑怡Zoie等，呢日為7月5號晚舉行嘅《明愛暖萬心》進行綵排，由音樂總監趙增熹帶領下與管弦樂團一齊排練。
Agnes嘅媽媽於上月17號離世，享年100歲，日前佢喺社交平台發文悼念亡母，Agnes呢日雖然未有受訪，但保持表現專業同後輩Chantel 及黃博夾歌，Agnes無論喺唱法同台風方面都畀咗唔少意見。Chantel首次同Agnes見面，大讚前輩超級友善，聽到對方聲音好溫暖，感覺好sweet。
中聲唱將譚輝智同做過中聲3評審嘅布志綸將會首度合作，輝智參賽時已經唱過Alan嘅歌曲，所以佢哋喺夾歌時已經擦出好多火花，Alan仲將歌詞「如果我是陳奕迅」，唱成「如果我是譚智輝」，話掉轉個名順口啲。
而黃博除咗同大前輩Agnes合作之外，亦會同劉洋合唱，兩大魔王合唱令人期待，黃博話好多人都問佢同大炮(指劉洋)合唱驚唔驚？但黃博就表示兩人比賽時已互相欣賞對方歌聲，能合作特別興奮。
TVB娛樂新聞台 嘅主播 謝淑怡 本身係位鋼琴家，今次佢會重拾鋼琴家身份，與周吉佩合作，兩人都會彈琴，吉吉仲話啱啱先知Zoie琴技咁高超，Zoie笑稱自己彈到鬼上身咁。古淖文亦會獻唱一首難度好高嘅金曲《希望》。
