何超儀 力捧嘅「醫生男神」Iman多才多藝，唔止會主演即將開拍嘅電影《拾荒法師2》，年底又會同超儀合演另一部愛情喜劇，更已連接多部荷李活電影。做戲行醫之餘，原來佢更係文采飛揚，即將舉行嘅書展就會推出首部親自撰寫嘅詩集《Lost In Your Eyes》。
詩集收錄Iman嘅多首詩歌，仲邀請曾為張國榮、梅艷芳等巨星掌鏡嘅國際攝影大師Sam Wong(黃永熹)操刀，作品於香港、澳門同泰國三地取景。鏡頭下嘅Iman盡顯波斯人氣質。原來Iman自幼就有寫詩習慣。17歲時於伊朗以優異成績考入醫學院，孤單嘅求學過程中，詩歌就成為寄託寂寥嘅夥伴。
其後佢喺戰地擔任志願醫生嘅經歷，令佢嘅詩歌見證生命嘅脆弱與人生無常。後來佢移居加拿大後， 面對新冠疫情再次執筆，以詩歌抒寫人生嘅無奈。而超儀同Iman嘅緣分亦始於詩歌，佢喺英文序言中提及，兩年前丈夫陳子聰到美國接受手術，命懸一線，就喺最心力交瘁時，Iman呢位來自波斯嘅醫生由加拿大飛到美國，不單止術後悉心照料子聰，更成為夫婦兩人嘅 心靈導師，陪伴佢哋走出生命幽谷。
事隔兩年，超儀未忘記Iman詩歌嘅力量，仲將《Lost In Your Eyes》視為公司嘅最新跨媒介企劃，標誌支持跨領域藝術家道路上嘅新步伐。超儀坦言希望詩集嘅治癒力量傳遞俾更多人。
