年度大型慈善騷《星光熠熠耀保良》，將會喺8月9號晚隆重舉行，呢日其中3位大會司儀李浩林Derek Li、黎芷珊同陳庭欣Toby及有份演出嘅歌手現身記招透露精彩演出。
現場逼滿支持羅啟豪Ramon、譚輝智、張與辰、黃博、姚焯菲Chantel、張馳豪Aska、林智樂Filex同詹天文Windy等嘅粉絲，場面熱鬧。Ramon喺慈善騷中會首唱新歌，而呢首歌嘅歌名都未定，認真新鮮熱辣，Ramon只透露歌曲同以往曲風截然不同，有強嘅節奏感，令身旁嘅輝智揣測佢會跳舞。
喺節目中仲有好多新鮮嘅Cross over，輝智會首度孖連詩雅Shiga合作，與辰就會同古淖文German以及Aska有唱跳舞台，與辰事先聲明自己係最差一個，Aska就期待同大家擦出火花。
中聲3嘅演唱會同黃洛妍Janees首個個人演唱會都進入最後綵排階段，與辰預告會有Closplay送上，叫粉絲們可以盡情期待。Janees出席完保良宣傳活動就會乖乖作最後準備。
Chantel會同Windy、鍾柔美Yumi喺呢個星期六去廣州開音樂會，忙於排練之餘，Chantel都好勤力埋手製作新歌，佢仲首度挑戰參與作曲，而Windy亦學習緊編曲，希望日後學以致用。
