羅家英喺5月尾透露自己第四度患癌，受訪期間樂觀嘅佢表明唔接受電療同化療。自訪問出街後，家英哥首度現身香港公開場合，並大談身體近況，家英哥指身體安好，由於需要注射針藥治療，導致身體變弱、糖尿增高、貧血及唔夠氣，所以不時需要睡眠補充體力，閒時又會做運動散步。
由於糖尿指數嚴重，家英哥喺醫生建議下轉為打糖尿針治療，稍後會再睇泌尿科醫生，有機會要打女性荷爾蒙針。問到阿姐係咪佢嘅私家看護？家英哥就即刻笑住放閃光彈：「佢被我看護。」數度抗癌成功嘅家英哥，透過飲食同運動抗癌，如今繼續享受人生，不時跟太太汪明荃四出旅遊，稍後工作不斷可以話係不言休。
同場出席活動嘅仲有陳雅倫、張文慈、呂良偉夫婦及黃一山等，啱啱去完意大利度假嘅呂良偉，原來行程約埋好友甄子丹一家同遊。久未喺香港露面嘅細龜，談到周星馳早前喺深圳拍攝新戲《少林女足》時，居於廣州嘅佢本想前往探班，但星爺托身邊人傳話表示有心。
陳雅倫早前接受直播節目《直播靈接觸》訪問，公開遇過嘅靈異故事，原來佢嘅經歷仲有後續，最近到過殯儀館送別家人後，又再遇上靈異事件。
