年前公開患有漸凍人症嘅資深綠葉 吳博君 月初離世，家人透過曾協助佢嘅有心人證實噩耗。呢位自TVB藝員訓練班第8期畢業嘅稱職綠葉；當年與湯鎮業、廖啟智份屬同班同學，多年來曾參演多部劇集，雖然並非主角，不過就個個都充滿特色。
好似呂頌賢版《笑傲江湖》中嘅「桃谷四仙」，夠晒怪雞又搞笑；黃日華版《天龍八部》中嘅風波惡，就夠義氣又豪爽；仲有《鹿鼎記》嘅楊溢之，同陳小春扮演嘅韋小寶做兄弟，最後被做成「人彘」，慘到觀眾都為佢喊。角色就算戲份唔多，都令觀眾有深刻印象。
1997年金融風暴後吳博君離開電視圈，為生活曾任職酒樓清潔、保安等工作，被認出時更會笑嘻嘻同觀眾傾計。可惜2018年吳博君患有漸凍人症，需以輪椅出入，亦因肌肉減少需進食軟餐，本來負責照顧有小兒麻痺症太太嘅佢，得病後就由照顧者變為被照顧者，夫妻不離不棄互相支持。
圈中朋友劉德華、薛家燕、張家輝等於知悉事件後曾出手幫忙，演藝人協會亦安排義工協助。吳博君年前接受演藝人協會訪問時曾指，就算患病後對做戲仍然帶住熱情。呢位綠葉演員曾經光彩，佢對表演嘅堅持同面對困境嘅勇氣，令牧丹都相形失色。
