結合《新秀歌唱大賽》、《超級巨聲》及《聲夢傳奇》嘅全新歌唱大賽《聲秀》，經過逾兩個月特訓後，25位平均年齡21歲唔夠嘅潛力新星聽晚將於預熱節目《聲秀 序曲》首次登場同觀眾見面。
趙一霖（阿霖）、司徒泆 Haru、陳芷晴 Isabelle、溫俊祥Johnson、張欣翹 Luna、陸卓謙 Jeffrey、冼奕瑜 Jasmine、徐惠晴 Vanessa、布子殷（布子）、胡港豐 Andrew、喬美莎 Chelsea、周智敏 Emily、陳卓怡Hoonry、文雅姿 Xylia、林潔心 Bibi、陳芮萮（阿寶）、甄敏芳 Jenny、柯雨霏Ophelia、胡子貝 Matt、張津銘（金鳴）、鄧偉謙 Theodre、林錦興（小林）、馮熙燮 Ryan、蕭凱恩 Michelle、穎喬 Ziva
《聲秀 序曲》星期日晚 20:00 翡翠台隆重登場
主要以廣東歌作賽主嘅《聲秀》，雖然下星期先全面展開，不過聽晚播出嘅《聲秀 序曲》就會由7大導師 蘇永康 譚耀文 劉浩龍 吳浩康 泳兒 鍾舒漫 同 胡鴻鈞 七大導師；道出佢哋當年參賽趣事，亦會分享加入樂壇後嘅高低起跌、以及挑選學員嘅準則。
1988年參加《新秀歌唱大賽》獲金獎嘅譚耀文，雖然投身演員行列後多年未有唱歌，但亦坦言從未放下對歌唱熱愛：「我好鍾意音樂，對唱歌仲好有熱誠，希望不斷可以再進步。」佢又更笑言希望可以做到「傳承」：「我會希望我以往嘅舞台經驗同演戲經驗，可以幫助到學員歌曲傳達訊息嘅技巧。」
泳兒亦坦言得獎後並非一帆風順：「大家唔好以為我攞到咗名次就係順風順水，嗰個只係一個開始，點解？因為將來嘅路都會充滿住好多挑戰，但正正因為有好多呢啲難關，令到我好勇於挑戰自己。」
至於1997年喺《全球華人新秀歌唱大賽》成為金獎得主嘅 劉浩龍，就搞笑自揭「師兄」名字由來：「贏咗新秀之後，我喺TVB做咗幾年主持，甚至冇做娛樂圈嘅工作、出咗去賣錶，好辛苦好辛苦。到2004年可以做到歌手，第一隻派台歌就係 黃偉文 寫畀我嘅《師兄》 。」
而講到挑選學員嘅準則，最霸氣嘅就非吳浩康莫屬，近年成為負責養家好男人、轉行做職安真漢子嘅佢好男人形象深入民心。原來阿Deep除咗唱得之外，更已任歌唱老師9年，導師資歷毋庸置疑，阿Deep仲聲稱自己「咩聲都Tune到」： 「我覺得態度好緊要，因為唱歌唔係話你點一點我、我就明白同開咗竅。當然聲底好會有優勢，但我係無論咩聲都tune到，唱功我亦可以再教佢。」
《聲秀 序曲》亦將詳細介紹《新秀》、《巨聲》同《聲夢》，幾個經典歌唱比賽嘅演變同特色；為令觀眾更全面掌握以上幾個歌唱比賽嘅歷史，製作組亦邀請BIG FOUR、吳雨、陳潔靈、趙增熹、陳奐仁、森美、郭偉亮同舒文等樂壇代表人物訪問分享。
節目中仲有唔少珍貴嘅紅星昔日比賽片段出土，好似黎明獻唱《絕對空虛》 、《中年好聲音》主持 車婉婉 於跑步機上獻唱《一起走過的日子》 、許廷鏗同吳業坤當年嘅搞笑木獨樣，亦有陳奕迅同楊千嬅參選新秀時於現場玩遊戲片段，當年嘅Eason青澀程度更讓人一見難忘。
《聲秀 》7月27號起 逢星期日晚 20:00 翡翠台