全新歌唱選秀節目《聲秀》，上星期播出序章介紹咗25位學員同七位導師，接住就會進入賽程。首先上演嘅係七位導師爭奪學員環節，每位有3個名額，冇被導師揀選嘅4位學員將被淘汰。節目分成上下半場播出，25位學員各獻唱一首歌，導師要向心水學員撳燈搶人，只有一首歌機會打動導師，所以揀歌方面學員落足心機。
來自江蘇嘅胡子貝（Matt）挑戰女歌男唱，演唱容祖兒嘅《心之科學》，廣東話歌雖然令Matt感受挑戰，不過佢認為係令自己進步嘅一種方式。冼奕瑜（Jasmine）就揀咗自己嘅強項，唱跳鄭欣宜嘅《@princejoyce》；柯雨霏（Ophelia）就演唱周柏豪《我的宣言》、鄧偉謙（Theodre）演唱Dear Jane《2084》。
林潔心（Bibi）喺揀歌方面就更加大膽，挑戰「打大佬」，揀咗泳兒嘅《溝渠暢泳》，而原唱就喺佢面前。Bibi就話認識呢首歌嘅時候正係公公離世，種種原因令佢唱得好感觸，亦認為自己喺第一回合要拎出所有本事，令導師選擇自己。
學員林錦興（小林）喺賽前因被發現同吳浩康撞樣，加上二人工作都係喺地盤，所以大家都好關心佢會唔會成為阿Deep嘅學員。阿Deep都好關心林錦興，仲向製作組了解過添！
