楊千嬅日前接受電台節目嘅錄音訪問，與主持人分享媽媽經。千嬅形容自己做媽媽係一件好Amazing嘅事，指呢個角色令佢好快樂，同時亦分享與囝囝相處嘅要訣。千嬅指自己做咗媽媽後，與父母嘅溝通亦有所改變，有時候想話小朋友做得唔啱時，就會諗返以前，代入自己嘅想法，調較自己點同小朋友溝通。
提到囝囝Torres 已經13歲踏入青春期，對此千嬅慶幸自己係護士出身，對溝通理解、心理健康有認知，理解病人感受係第一，亦因而訓練出耐性去聆聽，佢指當聽到問題時唔好第一時間打壓小朋友，因為原生家庭會對小朋友嘅將來有深遠嘅影響：「我用自己的青春期去做一個量度，我在青春期時都不敢表達，父母較傳統，會有很多不准不可以。現在回想，他們的不准是合理的，只是之後沒有解釋為何不准。現在我會跟兒子分析，做了這件事會有三個結果，過程中要怎做由他自己選擇。」千嬅坦言希望下一代懂判斷、選擇，唔好媽媽講咩就做咩，佢仲以聽音樂為例，指Torres聽嘅音樂已經同佢唔同，但唔可以否定對方嘅喜好。
千嬅曾經去過唔少中、小學出席講座，問到而家嘅中二生將來會想使咩，好多都回答唔到，千嬅又指而家好多作文「我的志願」都係作出嚟嘅，因為如果小朋友寫鍾意打機，可能會畀人鬧，但佢覺得唔好因為小朋友做嘅事唔乎合自己嘅期待就否定：「我會問他會怎樣打，打機將來可以做甚麼？做朋友都會有同埋心，對子女也一樣。」
講到同囝囝嘅相處，千嬅指自己工作時會有情緒、壓力或疲倦，所以返到屋企段會先用一、兩小時休息，之後再同兒子相處做朋友，唔想帶着情緒跟兒子說話。千嬅話Torres唔係咩都會同自己講，有時都同爸爸丁子高講，不過佢就好少會問返老公佢哋嘅對方內容，因為唔想個仔對爸爸失去信任。
千嬅指任何人都會有脾氣，所以如果大家都忟憎時，佢會叫囝囝入房先冷靜一下：「我都試過大聲跟他說話，我知他感受不好。」佢仲笑言自己入行三十年，與兒子相處之間嘅問題只係「碎料」。同時佢又指而家嘅社交媒體太厲害，家長們應該要學識同子女share screen，一齊睇佢哋睇嘅嘢，而唔係block screen，因為成長如果冇咗好奇心唔係好事。問到千嬅有咩錦囊分享畀家長們？佢覺得做父母要相信自己嘅小朋友，自己就好少會check囝囝嘅電話。
