近年以香港作為基地嘅 龔柯允 日前於香港舉行首站《Light》廣東歌分享會，現場座無虛席。Karen唔止獻唱多首新專輯歌曲，更剖白兩年來嘅創作歷程，期間更一度哽咽，獲全場觀眾熱烈打氣。
Karen一登場就難掩激動，以概念EP嘅主打歌《Don‘t wanna move》揭開序幕：「嚟香港發展第15年，兩年前終於有機會推出呢隻廣東話概念EP，籌備過程好漫長，試過懷疑自己係咪做得唔夠好，但今晚見到大家，真係好感恩。」除咗Fans支持外，多位圈中好友包括同門師弟 鄺星宇 區瑞強嘅哥哥 區瑞明 等都有捧場，唱作歌手 陳映同 就擔任暖場嘉賓。
Karen又詳細分享籌備首張廣東話概念EP嘅歷程，專輯六部曲中嘅第四章《原諒有用》係佢最掙扎嘅歌：「寫呢首歌時諗返起好多過去嘅遺憾同和解，錄音時喊咗好多次。」仲指製作過程充滿挑戰，甚至一度令EP無法順利推出，所幸團隊全力支持加上丈夫默默陪伴下，最終突破困境完成作品。
完騷後Karen仲驚喜預告，下月將衝出香港到北美舉行分享會。《Light》自推出以來反應熱烈，《人設崩壞》同《原諒有用》嘅點擊率都極佳，更有唔少隱世素人歌手同Karen一齊高音挑戰。