羅家英 繼多年前戰勝肝癌後，今年公開承認年來曾多次罹患癌症，目前亦第4度患癌，仲向外聲稱拒絕治療，雖然太太 汪明荃 已多次向外界解釋，不過近日家英哥接受資深傳媒人 查小欣 嘅網上頻道「紅查館」訪問時，就再解釋所謂「拒絕治療」嘅意恩，仲指多次治癌已幾乎花光積蓄，目前以注射女性賀爾蒙治療導致非常疲累，加上早已切除前列腺，令性慾完全消失。
早前家英哥承認再度患癌，但表明唔接受化療同電療，因而傳出「放棄治療」嘅表態，而家英受訪時就詳細澄清：「我並唔係唔醫，而係用另一種治療方法；我之前切咗前列腺，檢驗報告冇事，但有啲嘢（壞細胞）潛伏喺深處，而家成型有好多粒切唔到，醫生話只得一個方法，就係打女性荷爾蒙針，遏止佢繼續發展，但大概8年之後就就需要化療、電療。我今年79歲，到時已80幾，所以我決定到時都唔會再化療、電療，除非呢段期間發明新科技，有藥物可以控制病情，否則不如盡情玩樂、飲飲食食！」
家英哥坦言自注射女性賀爾蒙針後，感覺身體較虛弱又容易疲累，又指早年切除前列腺後清心寡慾：「對於『色』字，個人定咗、淡咗！（性慾淡咗？）係冇呀。仲要打埋女性荷爾蒙，更加冇！慣咗，已經四、五年！」
佢直言2004年首次發現患肝癌時心情沉重、非常害怕，要靠唸心經平復心情；到10年後再驗出肝臟有事，就鎮定得多：「最重要係有冇錢？我冇買保險，亦從來唔信保險，我以前就知道，我一定要有積蓄！第一次（做手術）用咗，第二次又再用啲……（積蓄因治癌使晒？）仲未使晒，仲有啲。仲有一件事，我冇叫老婆（汪明荃）幫我！（如果阿姐話要幫呢？）佢又冇話要幫，佢知道我有（積蓄），如果佢願意幫我，我都好樂意！」
到第三次抽血驗出前列腺癌，家英哥就更加淡定：「抽咗8粒瘜肉，其中4粒有癌，我去台灣拍完旅遊節目返嚟先做手術，醫生話前列腺癌進展好慢，可以兩年後先接受治療。」今次四度患癌，家英哥已完全學識與其共處：「我同癌症講：『你喺我身體生存，我走咗你都要走！你咪以為你好威，大家相安無事，你唔搞我、我唔搞你，唔好喺度放炸彈！』」