近年香港樂壇女團接連加入參戰，而由音樂監製 伍樂城 打造嘅唱跳女團Honey Punch，經過多重選拔同密集訓練後終於強勢出道，6位介乎14至15歲嘅少女成員包括隊長Casey、Jacey、Chelsa、Colour、Keira同Alma，推出首支單曲《蝶式》，為樂壇帶來新衝擊。
Honey Punch成員各具不同特色同舞台魅力，首支單曲《蝶式》唔止由伍樂城親自監製同製作，更邀請曾為麥當娜、少女時代、aespa 等創作嘅國際知名作曲人 Josh Cumbee參與作曲，為Honey Punch打造充滿爆發力嘅出道作品。
《蝶式》MV公開短短一星期，影片平台點擊率已突破50萬，成績非常亮眼。隊長Casey對於好成績箱得驚喜又感動：「好感謝所有支持Honey Punch嘅樂迷，MV嘅留言我哋都有留意到，每一個留言都係我哋嘅動力！我哋會繼續努力，為大家帶來更爆嘅舞台同更好嘅音樂，請大家期待我哋之後嘅舞台！」
製作團隊又邀請 馬天佑 (Mayao)操刀MV嘅造型設計，由服飾、髮型、妝容到配件都精心搭配，襯托出成員嘅個人特質，為MV視覺效果增添不同色彩。
Honey Punch團名寓意「甜蜜重擊」，象徵成員們兼具甜美魅力同強大舞台爆發力。成員經過長時間嚴格培訓，由舞蹈、歌唱到造型都精心打磨。首支主打歌《蝶式》歌名，亦以破繭成蝶為概念，展現由練習生蜕變成長嘅歷程。
