羅家英與阿姐汪明荃80年代相戀，結婚20年來膝下猶虛，家英哥早前自揭第四度患癌，採取不化療、不電療，只用藥物控制嘅治療，家英哥近日接受查小欣《紅查館》訪問，罕有談及遺產分配及合葬等心願，家英哥透露多年前已買地土葬，亦預留物業及購買兩份保險畀老婆。
一向係圈中愛妻號嘅家英哥，四度患癌早已看破生死，近日接受訪問時透露已預早規劃後事安排，先係買咗兩份投資保險寫阿姐個名，最近又買咗一個物業畀阿姐，家英哥笑指阿姐得知後卻毫無表示；面對生死嘅問題，家英哥祝願自己長命百二歲，但佢言談間亦流露出對阿姐滿滿嘅愛：「估計我會走先過佢，佢身體唔錯㗎！…但我想遲過佢走，可以照顧佢。」
家英哥搬去阿姐屋企住，佢自言係「入贅」，不過佢同阿姐日常生活係AA制，二人喺錢銀方面溝通得好清楚，家英哥每月有繳付五位數家用，過數畀阿姐助手。家英哥更自爆喺廣播道有一間後備屋，若果兩公婆嘈交，佢就走去避難，不過家英哥話二人好少嗌交。
家英哥透露十幾年前已購入兩幅墓地，希望將來同阿姐土葬。家英哥話嚟緊八、九年就想四圍去行吓食吓住吓，被問有冇遺憾，家英哥坦言冇遺憾，做到就做，做唔到就算數。講到膝下無兒女，家英哥認有少少遺憾，不過感覺有好有唔好，「因為冇仔女，你就冇後顧之憂，唔會諗將來個仔點，最多就係諗我一生功力做大戲，冇一個後人承繼」。
