《女神配對計劃》9月8號起會改為星期一至五連播5集，而最終章就會於9月14號星期日晚播出。而自節目開播後已經非常投契嘅 羅毓儀 同 林俊其 ，節目播出後不時被遇見一同外出，近日又被撞見齊齊搭港鐵喇。
繼同遊旺角被指拖手後，呢次再「斷正」，Yuki同Kris就再有解釋，指Share手機齊齊睇，只係因為Kris拍攝嘅Party Room片段公開，兩人當時正討論點樣可以改善拍攝效果，認真有上進心同投入工作呀。
而Yuki就死口唔講到底佢同Kris發展到咩程度，淨係叫大家要記住留意9月中播出嘅結局咁話喎。
《女神配對計劃》星期日晚 21:30 翡翠台