第60屆台灣金鐘獎將於10月17、18號舉行，Lulu黃路梓茵將會主持第一日嘅「節目類」頒獎典禮，而第二日嘅「戲劇類」就會交棒畀曾寶儀。
二人主持經驗豐富，掌控節目流程駕輕就熟，面對每年頒獎禮遇上嘅「超時」大難題，Lulu同寶儀就搞笑話唔可以將超時嘅責任全部賴喺主持人身上，因為有好多時係得獎者發言欲罷不能，先會導致典禮嚴重超時，所以佢哋公開呼籲得獎者，得獎感言要盡量精簡。
身兼歌手、主持同演員等多重身分嘅Lulu，被睇好有機會憑許光漢主演嘅劇集《正港分局》入圍戲劇類最佳女配角，Lulu原本話自己完全冇諗過，不過得到大家嘅鼓勵，突然之間信心大增，一旁嘅寶儀仲叫佢快啲準備戰衣添！
