2025年對於陳曉東嚟講係別具意義嘅一年，因為今年佢正式「入五」踏入50歲，兼且出道30周年。一向愛錫Fans嘅東東，當然一如以往出席Fans見面會慶祝，而今年更以「50年華・30同行」為題。嚟自新加報、北京、東莞、廣州、順德等地Fans喺活動上，見證東東喺台上宣布最新音樂計劃。
活動上，播放咗由歌迷製作嘅回顧影片，東東見到自己由1995年至2025年嘅影視作品Showreel，佢喺台上感受良多表示，希望有機會拍更多電影，因為佢好鍾意參與電影拍攝，台下有FANS豪言：「我開套戲俾你！」全場立即歡呼起哄！
喺現場氣氛高漲下，東東隨即宣佈明年六月再踏紅館開騷，相隔七年再喺香港舉行個唱，東東透露已經進入揀歌階段，同時亦籌備推出新歌，仲向Fans承諾會多啲留港發展。 被問及來年個唱嘅安排，例如會否操肌？東東話：「咁要搵健身教練幫手，要操幾多舊先夠？（操夠六舊？）就操夠六舊腹肌，望大家收貨，哈哈！」
東東亦喺活動上嚟個騷前預演，先後獻唱《時間做證》、《易來易碎》同《這種年紀》，亦安排Fans分組合照，最後東東更被現場Fans嘅熱情所觸動落淚。
