2025港姐競選圓滿落幕，9號陳詠詩奪得冠軍、7號施宇琪、13號袁文靜分獲亞軍及季軍頭銜，而友誼小姐同最上鏡小姐都成為1號李尹嫣嘅囊中物。各位佳麗經過數月準備與集訓後，經歷決賽後終於可以舒一口氣喇。
冠軍Stacey完成連串採訪後，返到休息嘅酒店第一時間再接受爸爸同妹妹祝賀，Stacey仲指仍未能接受自己成為冠軍，一切都覺得非常夢幻，當時更堅張到震。而陳爸爸一直在場觀戰，亦指自己心情七上八落呀。
而亞軍Angela同季軍Jane亦都話冇估計到自己可以得獎，所以非常滿足，Jane仲指父母在場睇到一向男仔頭嘅自己歌舞表演，展示過往佢哋未見過一面，相信會非常驚喜咁話。
出爐港姐休息一晚後，星期一已再現身正式以香港小姐身份會晤傳媒，不過連獲兩獎Victoria就指心情仍未平復，仍未相信選美已經正式結束喇。大家都話會同家人齊齊食飯慶祝，Angela仲非常幽默指會食壽司慶功，不過就一定唔會食8萬蚊咁貴喇。
至於Stacey亦被傳媒揭開家族屬大慈善家陳瑞祺後人，佢就指屋企非常注重教育以及回饋社會，自細已耳聞目睹屋企嘅方針，亦會追隨行善傳統。
參與比賽一定有人歡喜有人愁，後台就見到4號莫凡賽後非常感觸落淚，五強止步嘅佢就指收到朋友鼓勵後就難忍淚水，3號蔡華英就一直在旁打氣安撫。
