林家謙一共10場嘅紅館演唱會圓滿落幕，被封「姐姐收割機」嘅家謙，今次搵嚟好多姐姐級藝人鄭秀文、楊千嬅、陳慧琳、張柏芝及宣萱等驚喜現身。
當中柏芝同宣萱更係近年好少企喺香港舞台演唱，家謙亦好開心邀請到偶像柏芝做嘉賓，佢覺得發緊夢咁，抱住20%機率去問吓，冇諗過夢想成真！家謙讚柏芝事前做足準備，又親自揀歌，家謙話柏芝唱到最後有少少眼濕濕。
家謙嘅另一位嘉賓就係宣萱，二人看似大纜都扯唔埋，家謙自爆六歲睇《難兄難弟》時見到嘅宣萱，呢次宣萱驚喜登場，難得喺舞台大開金口，令唔少觀眾跟住一齊唱。家謙之前睇宣萱嘅訪問，得知對方有聽自己嘅歌，佢本來係邀請宣萱睇騷，又試吓問宣萱想唔想唱歌，冇諗過宣萱一口答應！