去年因 蔡一傑 接受腦部手術，令原定嘅草蜢「Re:GRASSHOPPER演唱會」世界巡迴演唱會暫停，不過隨著傑仔非常理想嘅康復進度，巡唱亦將再次啟動。三子亦同時積極籌備明年4月嘅40周年紅館演唱會同推出全新專輯。傑仔更宣布會配合新歌《老的辣》推出「老的辣撈麵」，寓意大家撈到風山水起，身體健康。
蔡一智說：「今次演唱會真係同『Re 』呢個字好有緣份，喺傑仔Recover(康復)後，再Restart(重啟)，我哋會將呢個演唱會帶去新加坡、澳門、馬來西亞、廣州等地方，同大家一齊Reunion(重聚)。亦都會將好多草蜢經典歌曲Rearrange(重編)，希望帶俾大家耳目一新嘅感覺！」
阿智又用「打邊爐」形容演唱會重啟：「同喺香港打邊爐一樣，你打過一次邊爐，食第二次會有唔同感覺。」蘇老闆補充：「因為會有新菜式！」傑仔亦點頭同意。阿智仲話：「今次呢鍋邊爐加咗辣，因為蔡一傑寫咗首新歌《老的辣》，所謂『薑是老的辣』，有唔同食法。所以即使之前睇過都可以再睇，因為感覺會唔一樣！」
康復後精神十足嘅傑仔仲笑言今次唔止有得睇仲有得食：「要對《傑少煮意》嘅觀眾講聲對唔住，差唔多近兩年無上新片，首先係不斷做巡迴演唱會，後來又要做手術，所以今次推出『老的辣麵』希望大家包涵！」傑仔仲透露係「撈麵」，希望大家撈到風生水起！
完成四站巡唱後，緊接啟動「草蜢40周年企劃」，包括收錄傑仔新作《老的辣》同阿智作品《Framily》嘅專輯，仲有2026年4月紅館演唱會以及新一輪世界巡迴演唱會。阿智指：「上次喺陳慧琳演唱會宣布呢個消息之後，親朋好友就開始搵我哋買飛。大家唔使再搵我，爆㗎喇，預計12月公布訂票詳情。」
下月初嘅中秋節，草蜢仲會參與喺廣州舉行嘅一連三日「超級草莓音樂節2025」，更預告其中一場演出將勁歌熱舞近一個小時。阿智仲話到時要帶月餅、茶等應節食品去做騷，草蜢合體齊過中秋，人月三團圓！