由 梁詠琪 李心潔 楊采妮 許茹芸 2007年共同創立嘅「小黃花慈善基金」，成立以來不遺餘力協助弱勢社群。Gigi梁詠琪每年暑假仲會為基層學童安排唔同活動，好似每年為學童播放電影嘅「小黃花影院」，近年先後因為疫情以及Gigi嘅世界巡迴演唱會而無奈停辦。不過今年暑假Gigi雖然忙住為電影《無名指》宣傳，但仍騰出時間，再次以「小黃花慈善基金」創辦人身份，同「香港基督教女青年會」合辦「童心同行 光影同樂」電影分享會活動。
當日來自62個基層家庭；父母與子女超過二百人，一齊到戲院觀賞動畫電影。Gigi話：「雖然疫情期間，『小黃花』冇辦法舉行活動，但嗰段時間我哋都有幫手籌集消毒用品、口罩、快速檢測包。分別捐去唔同嘅機構，因為當年呢類用品供求好緊張，係好多基層家庭，好缺乏呢方面嘅資源，所以『小黃花』都希望可以出一分力，幫助有需要嘅人。」
對今年終於復辦「小黃花影院」，Gigi心情亦格外興奮：「一家人買飛入場睇戲，好似微不足道，但其實好多家庭都未必有呢個經濟能力。能夠喺暑假小朋友最開心嘅日子，有爸爸媽媽帶住一齊去睇戲，係一件好開心嘅事。」 當日Gigi穿上「小黃花」會Tee，提早迎接呢班「特別嘉賓」，而為答謝Gigi同「小黃花慈善基金」贊助基層家庭成員入場睇戲，各個地區中心亦派出一位小朋友代表，向Gigi致送親手造嘅紀念品答謝。
正投入新戲拍攝嘅Gigi，回想當日見到父母同小朋友一齊入場睇戲嘅歡樂畫面，令佢更加希望明年暑假，繼續籌辦更多唔同類型的活動：「除咗『小黃花影院』，我哋仲贊助一班學習障礙嘅學童，幫佢哋搵老師學跳街舞，但我覺得未夠。希望明年暑假，『小黃花』可以舉辦多啲活動，讓更多有需要嘅小朋友受惠，等佢哋可以過一個有意義、充滿歡樂回憶嘅暑假。」Gigi說。
