楊丞琳今年8月自爆身體出狀況，透露早前忙於完成手上工作及演唱會後，曾消失一個月就係因為要入院做手術，佢專心休養咗一段時間，噚日宣布睽違五年，再次推出全新專輯，繼續努力作，佢首支主打單曲《房間裡的大象》以「大象」為隱喻，描繪深藏心底卻難以講出嘅傷痛與不安，呈現出楊丞琳喺音樂中對成長與自我和解嘅深刻思考。
楊丞琳早前為新歌專輯「變髮」，換上俐落短髮搭配少女感空氣瀏海，挑染藍色展現與以往不同嘅面貌，瞬間減齡10歲，老公李榮浩同好友蔡卓妍都讚靚，當時唔少粉絲已估到佢即將出新歌！
楊丞琳今次唱新歌以真假音交替，揭開外在偽裝，將脆弱與勇氣交織進旋律，為聽眾帶嚟一場赤裸而真誠嘅心靈對話。楊丞琳喺錄音時並未一氣呵成，而係反覆斟酌為咗讓每一句盡可能直覺、真切，佢重錄咗幾次。
楊丞琳第一次聽到新歌demo時，就覺得旋律動人，當細讀歌詞後，佢更覺得有一種難以言說嘅緣分 ：「不是刻意去找人寫我的心情，但這首歌恰好能完整表述我這幾年的感受。」 楊丞琳認為呢首歌並唔需要炫技，而係要用柔軟聲線唱出溫柔嘅堅定。
楊丞琳話最喜歡一句歌詞係「愛是一萬次成長，好壞我全都珍藏」，甚至喺錄音前就放進自己嘅社交媒體簡介。楊丞琳喺MV中呈現三位素人角色嘅故事，包括過勞嘅上班族、被未婚夫拋棄嘅小資女、遭欺凌嘅高中生，希望透過最日常、最普遍嘅處境，讓更多人共鳴，楊丞琳直言隨住年紀與經驗增加，發現逃避並非解決方式，真正成長係接受呢啲情緒，並學會與它們共處。
