由陳友 黎瑞恩 張與辰 及 趙浚承 主演嘅音樂劇，呢晚完美收官，肥媽同一班中聲家族、仲有鍾鎮濤以及專程由澳洲返港嘅葉智強都有嚟捧場。雖然因為之前颱風關係，令劇組綵排時間受到影響，但係最終大家都可以順利完成演出，兼獲得觀眾好好嘅迴響，陳友同小恩子都覺得好感恩同感動。
陳友仲話，當小恩子喺輪椅上一邊唱一邊流眼淚時，佢都要提自己控制住，唔可以喊，因為會唱唔到落去。陳友太太都有現身支持，仲鼓勵老公要繼續做落去，簡直係忠實觀眾！而肥媽亦邊睇邊喊，更笑言被劉洋一直觀察，一喊就聽到佢講：「媽，要哭了、要哭了。」肥媽仲話，希望中聲家族可以有自己嘅舞台劇添！
兩位中聲唱將與辰同浚承，就分別飾演B哥哥鍾鎮濤同校長譚詠麟，而呢晚B哥哥仲係座上客之一，與辰都話會壓力，不過自己都唔再諗太多，加上呢次造型令佢地好似變成另一個人咁，都有另一種新鮮感覺。
浚承呢次演出，太太就因為要忙住帶阿囝返學，而未能來港捧場，但係佢都好關心浚承嘅工作，尤其係嚟緊浚承將會推出新歌，所以佢都好緊張老公MV女主角人選。浚承仲自爆收到老婆訊息，問新歌MV女主角有樣睇未？浚承就安撫老婆，目前人選未定，盡可能唔要女主角。與辰向浚承獻計瞞天過海，到時同老婆講，MV女主角係AI人就得！
