GM葉蒨文首情侶檔出席活動曬冧樣 幸福互笠高帽認戀情後已見家長

葉蒨文（Sophie）及曾展望（GM）呢日現身鬧市吸引大批途人圍觀，女神Sophie嘅大露背非常吸晴，今次係二人公開拍拖後首次以情侶檔身份出席活動，Sophie全程展現冧冧樣。

GM笑指情侶檔出活動非常興奮，寓工作於娛樂，講到平時GM有冇準備驚喜，一臉幸福嘅GM話講出嚟就唔驚喜，Sophie就話GM肯參加《女神配對計劃》已經係最大驚喜，覺得好浪漫。

GM日前出咗一個認錯帖文，稱自己唔記得與愛車「Baby」嘅5周年紀念日，身邊嘅Sophie即扮呷醋質問邊個「Baby」，GM笑笑口表示要「棄養」，只要Sophie夠晒。問到中秋節會唔會帶女友見家長，GM話阿媽識Sophie，已正式見咗家長，仲話屋企人覺得Sophie係完美，而Sophie讚GM家人好好，教出一個咁有教養又心地好嘅阿仔。