TVB處境劇《愛．回家之開心速遞》一眾演員呢日出席宣傳活動，跟大家預祝中秋，發揮創意DIY燈籠，而家越嚟越少人整燈籠，丹爺劉丹好懷緬童年自製柚皮燈籠，問到佢會唔會教孫女整，丹爺笑言孫女會叫佢喺街買就得。
10月7號係周嘉洛30歲生日，呂慧儀就抱怨嘉洛好難約食生日飯，丹爺笑指熊家人仲排緊隊等嘉洛畀期，豹哥單立文就透露熊家人送咗一個10月7號嘅車牌，嘉洛keep咗喺屋企，話第時買到名貴靚車就擺上去，滕麗名笑問架車係咪24座。
李芷晴今年中秋仍未搵到真命天子，佢話同家人歡度佳節一樣咁開心，講到佢之前喺《女神配對計劃》因拒愛遭網民抨擊，芷晴呢次學識收起眼淚，變得成熟去講自己想法，展現高EQ一面，又指仍有跟節目裡面嘅求愛勇者聯絡，不過大家暫時未有時間出嚟再聚。
《愛．回家之開心速遞》星期一至五晚 20:00 翡翠台