即將開騷紀念入行40周年嘅 杜德偉 ，除咗舉辦演唱會外，TVB亦特別為Alex製作咗個特輯，喺呢個咁重要嘅時刻，又點少得一齊成長嘅好友現身呢！節目組就特別邀請咗同Alex相識幾十年嘅好友 林敏驄 、 呂方 、 張衞健 等一齊現身分享昔日點滴。
林敏驄就話同大家冇見幾十年，一見到啲回憶就返晒嚟，好似返返去十幾二十歲嘅時光咁。林敏驄又指Alex係一個真正嘅表演者，好想睇對方跳舞，同時又笑身旁嘅呂方唔識跳舞。之前Alex開記者會，林敏驄二話不說即刻答應現身支持，佢話因為Alex係真正嘅好朋友呀。
Alex同呂方、張衞健都係參加新秀而入行，多年嚟佢哋雖然唔係成日見面，但大家一直Keep住友好關係，Alex同呂方仲慣性一見面就手拖手，感情相當好，不過問到佢哋見面會唔會攬下對方？呂方就話自己啲肌肉太勁，怕頂親對方呀。兩人相識處四十載，佢哋都話大家要對方做咩都會答應，不過問到會唔會做對方演口會嘉賓？呂方就話今次佢特登拒絕咗，因為佢話每次嘉賓都係佢實在係太悶喇。而Alex亦分享與幾位好友曾經一齊做過嘅事，仲話係TVB造就咗佢哋嘅緣份呀。
