近日係內地國慶同中秋長假，各地都有舉行大型活動吸客，亦邀請唔少香港藝人化身人肉NPC出巡見粉絲，其中視帝 黎耀祥 就應邀到廣州長隆一個主題樂園，為內地嘅「玩聖節」 (即香港嘅萬聖節)活動宣傳。
祥哥未有化身嘩鬼，反而Cosplay經典劇集《巾幗梟雄之義海豪情》中嘅劉醒，祥哥著晒戲服同粉絲合照，佢亦即場喺戶外同扮演非凡哥嘅演員對戲，重演經典場面。 雖然只係娛樂性質，但係祥哥依然七情上面認真演繹，令圍觀嘅朋友都報以掌聲。
祥哥嘅工作從朝做到晚，晚上佢再度出動參加園區嘅花車巡遊，仲同入場嘅朋友逐一打招呼同擊掌相當親民。 
另外一個大型嘅節慶活動「火人狂歡節」，就請到多位港星到唔同嘅情景區參加巡遊同粉絲見面，其中溫兆倫、李國麟、黃一山等著上戲服重現自己嘅經典劇集或電影嘅角色，好似溫兆倫扮《我本善良》嘅齊浩男、黃一山著住龍袍化身《九品芝麻官》嘅皇帝、李國麟就變身《天龍八部》中嘅鳩摩智，大熱天時出巡同市民見面，眾人都保持敬業嘅笑容，相信酬金應該唔錯。
而79歲嘅 羅家英 亦喺杭州化身人肉NPC，著起黃袈裟再次化身《西遊記》中嘅唐僧，家英哥早前自爆患上前烈腺癌，決定唔做化療，改以注射女性荷爾蒙針同服藥控制病情，正喺抗癌路上嘅家英哥繼續工作，呢次嘅工作亦相當耗體力，杭州當日天氣有攝氏25至36度，家英哥既要抵住炎熱天氣出巡同粉絲見面，亦要去舞台辦小型粉絲見面會，同影迷互動，不過家英哥就未有表現半點疲態，表現非常專業。
