車婉婉 一向非常着重家人摯親，日前佢參觀一個健康資訊體驗館，憶起陪伴患有腦退化症家人嘅經歷，再透過自身故事，希望大眾了解腦退化症，唔好令照顧者獨自承擔痛苦。
婉婉憶述照顧家人嘅4年經歷，佢話：「最初以為婆婆只係『老糊塗』，直到佢唔知係咪將一千蚊當成一百蚊使，銀行帳戶最後只剩五十幾蚊時，先醒覺有啲唔對勁。」
婉婉提及家人十多年前患病初期嘅疏忽，語氣充滿自責。佢憶述婆婆起初只係記性變差，好似忘記剛放好嘅鑰匙、重複詢問同一個問題：「當時我成日話『你點會又唔記得嘅』，而家諗返起，嗰啲都係病症嘅訊號。」後來症狀逐漸加重，婆婆開始出現多疑症狀經常鬧人，甚至試過將我昂貴嘅牛仔褲拎出嚟，仲將「鬚鬚線」位用剪刀全部剪掉。
近期婉婉嘅奶奶出現同樣病徵，婉婉話自己對腦退化症認識更多，所以照顧時亦識得體諒同包容，佢提醒大家：「唔好以為『無記性』係正常嘅，聽力受損、社交孤立呢啲都可能係風險因素，好多症狀都可以透過早期關注嚟減少患病嘅機會。」佢強調照顧者從來唔係『一個人的戰鬥』，有好好多有心機構好似賽馬會耆智園，會為患者同照顧者努力，令大家唔使獨自支撐。
