體壇盛事「第十五屆全國運動會」將會喺11月9 號至 26號喺廣東、香港及澳門舉行。距離全運會仲有25日，TVB台前幕後經已準備就緒，同全港市民一齊迎接盛事來臨。呢日舉行嘅記招，除咗有一眾主持同專業評述團列陣外，電視廣播有限公司總經理(商務營運) 蕭世和 先生及文化體育及旅遊局全國運動會統籌辦公室主任 楊德強 先生，主禮倒數儀式，為中國香港隊運動員打氣，預祝健兒創佳績。
TVB將會透過翡翠台、TVB Plus、無綫新聞台及明珠台四條免費頻道，聯同 TVB 官方社交平台、TVB News 無綫新聞流動應用程式、myTV SUPER 提供轉播、以及上載焦點賽事同精華。
巴黎奧運嘅主持們同專業評述團會再度上陣報道賽事，喺巴黎奧運中有出色表現嘅 何振然 同 莊琬晴 亦會再出動，相信亦會爭取到唔少精彩運動員訪問！何振然喺巴黎時採訪表現大受觀眾好評，不過佢笑言，自己喺過往都會有食檸檬嘅時候，只係自己識執生睇時機，儘量識做。有「體壇蔡思貝」嘅莊琬晴被讚親和力十足，而佢就話呢次要做好功課係件難事，因為好多運動員未必搵到資料，喺現場一定要靠主動了解。
鄭衍峰 就話今次全運會令佢覺得「零距離」，上一刻可能仲喺錄影廠，下一刻可能已經出外去做訪問； 何沛珈 就好期待全運會項目同賽事，同埋想睇邊位運動員可以脫穎而出；作為運動員嘅 劉倬昕 上一屆都有參賽全運會田徑項事，所以佢都好期待會唔會見到熟悉面孔。
今次賽事首次由廣東、香港及澳門共同舉行，香港亦都會承辦 8 項競賽項目，作為前單車港隊名將嘅洪松蔭都話一早買定單車賽事、欖球決賽、劍擊賽事門票，到時身體力行入場支持。
