周吉佩預告佛山個唱歌單有驚喜 林智樂報讀張敬軒課程自我增值

周吉佩呢日出席一個以追夢為主題嘅電台活動，講起追夢吉吉絕對係代表人物，自從第一屆《中年好聲音》奪冠後，佢就工作不斷，仲推出多首歌曲，完全可以話係夢想成真。

嚟緊12月吉吉就會去到佛山開騷，佢預告將會重新編排歌單，務求畀到大家耳目一新嘅感覺，吉吉話知道佛山有好多歌迷都係廣東歌愛好者，所以今次演唱會會唱一系列80後好喜歡嘅廣東歌，佢話希望到時可以嚟個千人卡啦OK，同大家一齊唱歌。

呢日由林智樂擔任活動MC，主持經驗越嚟越豐富嘅Felix話自己入行資歷尚淺，仲有好多進步空間，所以近期佢就去咗上張敬軒嘅課程嚟增值自己，Felix話軒公好好，每次上完堂take break時，對方都唔係自己去休息，而係問佢有冇咩地方唔明，又會做一啲示範，Felix指軒公不論喺工作上定係做人處事方面，對方都無私分享，大方程度都搞到佢有啲唔好意思。