處境劇《愛・回家之開心速遞》嘅一眾演員作客節目全新知識問答綜藝節目《攻你上大學》，一齊挑戰小學至大學嘅問題。一著起節目組為嘉賓準備嘅校服，至少65年冇再著起過校服嘅劉丹，亦因為呢次限定學生造型而勾起中一時對一位同班女同學嘅回憶！丹爺話嗰位女同學會將校服襯衫拉起，變成露臍裝，讀完中二上學期就因為突然懷孕而退學，呢段回憶令呂慧儀、張景淳都聽到「嘩」一聲啊！
湯盈盈喺丹爺訪問途中突然拎住一張男同學嘅相出現，話相中人係佢男朋友嚟！但實情原來係，相中人係16、17歲學生時期嘅丹爺！丹爺話呢張相連佢自己都冇，所以要沒收珍藏！
而喺咁多位「學生」之中，大小姐林淑敏嘅孖辮學生妹造型就成為焦點之一，連我地嘅主播許文軒都話，淨係睇背景都認唔出係大小姐本人。 淑敏笑稱要同廣大學生Battle一下，要令大家嚇一跳。另一位令大家眼前一亮嘅「女學生」就係樊亦敏，Amy就話自己專長「無知」，要做無知學生。
