陳敏兒喺10月中生日前夕，透過社交平台公開自己7月時發現身體出現狀況，需要接受緊急大手術。消息傳出後，唔少人都關心敏兒嘅情況。康復中嘅敏兒精神奕奕，呢日就同賈思樂作客娛樂新聞台《StarTalk》，接受主播 潘盈慧 訪問，佢話經已渡過最困難時候，身體康復進度理想，呼籲大家不用替佢擔。
至於病因，敏兒就表示保持少少私隱唔公開，但係佢解釋公開患病係想令大家知道，病咗都可以活得精彩，做想做嘅事。敏兒又講到一對仔仔一向都好乖，喺佢患病時都有關心自己，不過佢哋都明白媽咪好強同自立，所以都各自做好自己嘅嘢，敏兒亦唔想一對仔擔心。 
身為敏兒好友嘅Louie，一直都知道情況，佢話當然會擔心，但係又放心，因為敏兒係一個樂觀嘅人，冇嘢係應付唔到，只要思想正面，身體終會康復。佢又指大家應該以敏兒為榜樣，樂觀及積極面對患病，身邊嘅敏兒即讚Louie係好朋友。
敏兒解釋而家瘦咗，係因為改變晒生活模式，尤其係戒晒最鍾意嘅甜嘢嘅習慣，今年中秋節甚至棄食以往最愛嘅月餅。平日又會早睡早起，及跟胡楓行路做運動，佢話每日都行一個鐘。敏兒認為患病並非壞事，因為提醒自己愛惜身體。
