10月31號除咗係小儀同梁嘉琪離職電台嘅日子外，亦係電台長壽節目《早霸王》同大家告別嘅日子。小儀呢日正式告別30年嘅電台生涯，節目最後一集直播時，小儀獲偶像林海峰親自送上由佢手繪以及同事們寫嘅心意卡，令佢超級驚喜，電台亦有送花畀小儀感謝佢多年嘅付出。
作為最佳拍檔，森美被傳媒起哄要佢送上玉嘴歡送小儀，起初森美都迎合大家叫大家準備，但係最終佢都係嘴下留情，表示清楚拍檔唔情願，所以自己只係作狀錫錫搞氣氛。其實呢日森美除咗同節目《早霸王》講再見，亦係同電台老拍檔小儀最後一次做電台節目，森美、小儀同嘉琪都輪流感觸落淚。感性嘅森美受訪時再次變喊包，佢解釋自己諗返起好多往事同要感謝嘅人，所以先會hold唔住。森美坦言同小儀情如家人，就算唔再一齊開咪，但日後都會合作同見面。
小儀亦正式透露決意離開電台嘅因由，佢指喺電台工作30年，覺得係時候離開，加上去年爸爸身體出現狀況，好彩依家經已復康，令佢醒覺要抽多啲時間陪家人。本來電台想佢做埋音樂頒獎禮先離職，但係小儀自認任性，希望自己11月呢個生日月可以好好休息，所以決定喺10月31號請辭。
小儀離開DJ呢個工作，但依然會繼續接其他演藝工作，而嘉琪希望回歸自己熱愛嘅舞台劇界。三人更唔排除一齊合作拍劇，仲講笑話歡迎TVB開拍劇集《電台風暴》由三人演出，而森美就趁機宣傳明年推出由佢同Eric Kwok主持嘅綜藝《唱錢》。
