Benz哥許紹雄上月28號突然離世，不論係圈中人定觀眾均大感不捨及痛心，而Benz雄嘅獨女許惠菁（Charmaine）一直未有發文抒發感受。直至11月4號爸爸嘅生忌，Charmaine終於喺自己同爸爸嘅社交平台發文悼念。
Charmaine分享一張兒時為爸爸慶祝生日嘅相片，同一條爸爸話去開工嘅短片，寫上「爸爸… 今日係你生忌。呢幾日好唔真實，願你依家自由自在，安心去需要去嘅地方。我就當你去咗開工，B組ready！」Charmaine好感恩除咗親友對自己一家人嘅愛同支持，仲有好多我唔認識嘅朋友對佢哋一家嘅慰問，原諒佢未能逐一道謝，但每個網友關心都銘記於心。
Benz雄生前拍下唔少帶出正能量訊息嘅短片同開心片段，Charmaine話「爸爸所有社交平台都會被保留，繼續與大家分享佢嘅點滴，延續『歡喜』嘅精神。」最後Charmaine難掩不捨之情：「沒有你，生活將永遠不再一樣，但我會因為你而努力堅強。我無比想念你，愛你永無止境。」
