許冠文 呢日全家出動，現身陳子慧嘅個人藝術展開幕儀式。Michael同 陳子慧 相識多年，更被陳子慧形容係「師父」一樣嘅角色，而Michael亦好欣賞呢位老友對藝術嘅態度。
Michael形容陳子慧性格同自己好似，一樣都係對藝術追求極致，而且陳子慧嘅冰畫作品有一種難以形容嘅吸引力會令人著迷，自己亦唔明白點解。
直到有一日，陳子慧親自解答，以冰畫為例，佢將冰吊起，冰自然溶化成為水滴，滴落紙上時會綻放出唔同圖案，呢樣就係利用大自然力量創作。大自然畫七成，陳子慧畫三成。Michael更搞笑形容，自己當初聽完，認為係陳子慧邀請上帝作畫，上帝畫七成，陳子慧畫三成。
