家英哥早前先同Liza姐去完不丹曬恩愛，近日佢就同多位老倌包括已甚少露面嘅南紅、王超群、王志良、劉惠鳴同莊婉仙，齊齊應資深製作人 楊紹鴻 邀請，飛到泰國曼谷為當地觀眾演出兩場粵劇及折子戲。
眉姐南紅自90年代末期逐漸減少演出，已逾90歲嘅佢，笑言係因為家英哥先出山，仲齊齊表演《鳳閣恩仇未了情》。眉姐中氣十足非常精神，仲話希望繼續將粵劇呢門傳統藝術繼續發揚。
之後佢又提到長壽秘訣，認為多多出門旅遊非常有幫助，不過就話唔需要奢侈搭頭等同商務機位，慳慳哋周圍行吓見識吓非常有益身心理咁話。眉姐又提到當年同Liza姐相處嘅往事，指不時都獲Liza姐暗中安排合作出演母女檔咁話。
家英哥亦指眉姐閒時不時作畫寫宇，亦因Liza姐關係屋企有收藏眉姐墨寶，家英哥仲搞笑話，眉姐得閒就作畫，而佢自己就學做Facial，所以老婆Liza姐皮膚靚靚都係因為自己手藝好咁話喎。