冬至呢日真係香港劍擊界大日子，先有奧運金牌 張家朗 同世界冠軍 蔡俊彥 於「香港公開劍擊錦標賽」夢幻對決，而已經退役嘅劍擊隊大師兄 張小倫 亦宣佈喜獲麟兒，月前小倫已公開自己將為人父，呢位2024十大傑出青年，今日亦公開已經正式升任爸爸，同2019年結婚嘅太太升任做新手父母，同囝囝Miles一齊迎接新生活。
小倫話因為Miles太大隻嘅關係，醫生喺預產期一星期就要老婆入醫院催生，但係Miles就留戀媽媽肚皮三日佢唔肯出世，最後醫生決定開刀將佢帶嚟世界，Miles體重有成9磅，小倫仲話囝囝同自己一樣手長腳長✌️。
佢於社交平台寫道：「生BB真係好似打一場激烈比賽，過程充滿着變數，係產房聽到BB喊聲嗰刻，真係忍唔住喊咗出嚟🥹所以，生小孩不是單純的疼痛，而是一場需要勇氣、耐力和智慧的比賽。每一位媽媽都是真正的冠軍。」
「辛苦晒老婆Love you 🫶❤️
希望BB健康快樂成長，同佢嘅英文名意思一樣，可以勇敢面對呢個世界🤗」
小倫又公開早前同太太一齊拍攝嘅孕照，於太太孕期30週時拍攝，即使當時太太已經腹大便便，體態仍保持纖細優雅。小倫亦表示希望兒子接觸更多唔同事物，培養佢不同興趣，最希望Miles將來會對劍擊有興趣，可以於劍道上同Miles享受親子時光。